Bókar
Heimilisbókhaldiskerfið
Persónulegt bókhaldskerfi?
Bókar er verkefnið sem kom mér fyrst inn í vefsíðugerð og hönnun árið 2022 Þetta hefur verið svokallað *pet project* hjá mér alveg síðan og er líklega verkefnið sem ég hef lært mest af. Hugmyndin á bak við Bókar er að safna saman upplýsingum úr mismunandi kerfum, eins og bankareikningum, lífeyrissjóðum og verðbréfareikningum, þannig að notandi geti séð fjárhagsstöðuna sína á einum stað í stað þess að hoppa á milli ólíkra þjónusta. Verkefnið hefur farið í gegnum nokkrar endurhannanir í gegnum árin. Í hvert skipti sem ég hef bætt mig í hönnun eða notendaupplifun hef ég endurmetið hvernig kerfið ætti að líta út og virka. Hönnunin sem þú sérð hér er því langt frá því að vera endanleg. Hún er rétt að byrja að taka á sig mynd og það er enn margt sem á eftir að þróa og betrumbæta.
Mitt hlutverk
Ég hef séð um að skipuleggja allt kerfið, hanna hvernig það virkar og lítur út, ásamt því að þróa allan framendann. Eins og staðan er í dag er verkefnið eingöngu komið á framendastig. Ég hef því ekki farið í þróun bakendans enn sem komið er, þar sem markmiðið hefur fyrst og fremst verið að móta hugmyndina, notendaflæðið og notendaviðmótið.
Lærdómur
Þetta verkefni hefur líklega kennt mér meira en nokkuð annað hversu mikilvægt það er að skipuleggja verkefni vel áður en maður byrjar að hanna. Það er ekki nóg að hugsa bara: „Ég vil sjá hlutabréfin mín.“ Maður þarf að fara skrefinu lengra og spyrja: „Hvaða upplýsingar vil ég sjá þegar ég opna hlutabréfasíðuna? Hvað skiptir raunverulega máli og hvað er bara aukaatriði?“ Það hefur líka verið mjög lærdómsríkt að hanna lausnir út frá þeim upplýsingum sem eru raunverulega aðgengilegar í gegnum Open Banking (PSD2). Það er auðvelt að teikna upp fallegt viðmót í Figma, en allt annað mál þegar maður þarf að vinna með þau gögn sem bankarnir gera í raun aðgengileg. Eitt dæmi um það er flokkun bankafærslna. Ég þurfti að finna leið til að flokka útgjöld á sjálfvirkan hátt og þar kom reynslan mín úr greiðslulausnageiranum sér vel. Ég ákvað að byggja flokkunina meðal annars á MCC-kóðum (*Merchant Category Codes*), sem gefa góða vísbendingu um hvers konar verslun eða þjónustu færslan tengist. Svona verkefni hefur kennt mér að góð hönnun snýst ekki bara um hvernig kerfi lítur út, heldur líka um að skilja gögnin sem eru í boði og hanna raunhæfa lausn í kringum þau.
Skemmtileg saga
Þar sem Bókar er enn ekki komið á þann stað að ég geti farið að tala um allar tæknilegu lausnirnar eða vandamálin sem komu upp í þróuninni ætla ég frekar að segja söguna af því hvernig verkefnið varð til. Þegar ég var í menntaskóla og kominn í sumarfrí hafði ég nýlokið bókhaldsáfanga með bestu einkunn sem ég hafði fengið. Ég var staðráðinn í að halda áfram að æfa mig yfir sumarið svo ég myndi ekki gleyma öllu áður en skólinn byrjaði aftur. Svo lenti ég í frekar einföldu vandamáli. Það var eiginlega ekkert kerfi sem ég gat notað. Ég fann engin demókerfi þar sem ég gat æft mig og ekkert sem leyfði mér að halda utan um eigið persónulegt bókhald nema kannski Excel, sem var alls ekki það sem ég var að leita að. Eftir smá leit rakst ég á Meniga, en mér fannst það einfaldlega ekki höfða til mín. Og ég meina það bókstaflega. Mér fannst hönnunin ekki skemmtileg og mig langaði líka að geta gert ýmsa hluti sem kerfið bauð ekki upp á. Þá ákvað ég að gera það sem margir forritarar gera þegar þeir finna ekki lausn sem þeim líkar: að reyna að búa hana til sjálfur. Ég ræddi hugmyndina við tvo vini sem ráku hýsingarfyrirtæki hér á landi og höfðu reynslu af vefsíðugerð. Þeir hjálpuðu mér að koma fyrstu útgáfunni af Bókar af stað. Síðan, eitt sumarið, ákváðum ég og félagi minn Kría að stofna fyrirtæki í kringum verkefnið og reyna að gera það að alvöru vöru. Það fyrirtæki varð síðar að Spaug. Nokkrum árum síðar er Bókar enn ekki komið út. Verkefnið hefur breyst, stækkað og þróast mun meira en við gerðum okkur nokkurn tímann grein fyrir í upphafi. Það er kannski smá kaldhæðnislegt, en án þess hefði Spaugur líklega aldrei orðið til.